قصيدة أنا من قبلي

عضو ذهبي https://soon.yoo7.com‏

‏ رامى أبو عزب محمد مرسى , قصيدة ( أنا من قبلى ) يهديها الي أهالي صعيد مصر
- - - - - - - - - - - - - - - - - -
(أنا من قبلى)
جايلك متمرمط فى طينك مع نيلك
جايلك بالجلابيه والعمه والعصا والشال
فى الجلابيه هيبتى
و فى العمه طيبتى
و فى العصا عصبيتى
و فى الشال همومى
أصل دى هدومى يا أمى
يالى نيلك بيجرى فدمى
جايلك مكافح
وعلى جبينى المرار طافح
تعبت من ظلمك ومن ألمك وبرضه ساكت مبتكلمش
لأنك امى ونيلك بيجرى فدمى
يا أمى قبلى ناس تعبانه
وفالغربه طفشانه
علشان مفكرتيش فى يوم تزقيها كبايه هنا
لأنها عطشانه
يا أمى بينى وبينك مسافات
قولتيلى القطر بيقرب الخطوات
بس يا أمى القطر اللى بيعدى مبيعديش من سكات
يا أمى انا هحكيلك ومتقوليش حكايات
جدى مات وبنالك السد العالى علشانك
وأبويا أتحرق فى قطر العيد ومنسعتها ما لبستش لبس جديد
وأخويا أتقتل على الحدود يارب أحتسبه عندك شهيد
وأبنى راح ضحيه مدرسته ودمه لسه قاعد على كراسته
أنا مش بشكيلك أنا عايز حقى يرجع ويتكتب فى كتبك وكشاكيلك
علشان الكل يعرف مين هوه اللى عايش قبلى
ناديتلك من قبلى كتير علشان خاطرالتغيير
ياترى كنتى سمعانى ولاسامعه ومطنشانى
شاركنا فى الثوره علشانك وأنتى عامله مش واخده بالك
والشاهد على ذلك دم أولادنا لسه فى ميدانك
أحنا اللى نجحنا رئيسك ودستورك
خايف يا أمى لتعملينى كبرى لعبورك
يا أمى قبلى ناس من مواصفتها العادات والتقاليد
وكلها أصلى ومش تقليد
يا أمى الرجوله والأخلاق والأدب والكرم هما دول الهرم بتاع قبلى
يا أمى قبلى تعليم ومستشفيات وحكومه وسكه وطرق مفيش
يا ريت يا أمى متعيطيش
أصل بقالك سنين وسنين ما أخدتنيشفى حضنك ومشوفتنيش
يا أمى أنا حكيتلك جزء صغير من اللى حاصل قبلى
ورغم كل ده عمرى ما نسيت انك أمى ونيلك لسه بيجرى فدمى
أنا عارف أنك دلوقتى أتأكدتى أنى أنا فعلا
أنا من قبلى
- - - - - - - - - - - - - - - - - -
مع تحياتى
شاعر الجنوب / رامى أبو عزب

عضو مميز

=
كل الشكر والامتنان على روعهـ بوحـكـ ..
وروعهـ مانــثرت .. وجماليهـ طرحكـ ..
دائما متميز في الانتقاء
سلمت يالغالي على روعه طرحك
نترقب المزيد من جديدك الرائع
دمت ودام لنا روعه مواضيعك
ايها المتالق

» قصيدة حرم الجمال
» قصيدة أيوة عاااايش
» قصيدة غير منتهية في تعريف العشق