أنا عاشق في الهوي

انا عاشق فى الهوى... غاوى اقول شعر الغزل فيكى
ومهما اقول واقول فى كلام ...كلامى ازاى يكفيكى
دى كل الدنيا ما تساوى نظرة حب ف عنيكى
وكل كلامى ما يقدر على وصف الحنين ليكى
--اقول كلمة؟--
قلبى يدقها ليكى
احاسيسى تكتبها لعنيكى
ومن دمى ودموعى الحبر
--اقول بسمة؟--
بتسعدنى
تفرحنى
تهون لى مرار الصبر
--اقول نسمة؟--
بتحيينى
تواسينى
تريحنى فى عز الحر
--اقول نغمة؟--
على الحانها بتكلم
وبتالم
وادوب فى كل لحظة عمر
--اقول نجمة؟--
تنور لى لياليا
ويشبه نورها نور الفجر
--اقول نعمة؟--
بعتها ربنا ليا
عشان انسى العذاب والمر
--اقول قسمة؟--
نصيبى اعشق ملاك اجمل من تمام البدر
اقول لك ايه؟؟؟
واعيدلك ايه ؟؟؟
بحبك ليه؟؟
وايه السر؟!
لازم فى الحكاية سر!
ايوة خلاص عرفت السر
عيونك دول اساتذة سحر
اخدونى
واسرونى
بامر الحب امرونى
لقيتنى بحب ..
لقيت نفسى بدون ما اختار
بروحى وقلبى وعنية بلبى الامر
واقول فيكى قصايد شعر